颱風「海鷗」來襲，噚日晏晝香港唔少地區已經掀起狂風暴雨。話說街工立法會議員梁耀忠，噚日搭完政府總部外面嘅扶手電梯，想穿過政總返去立法會以免暴雨下濕身，點知竟然被政總圍城內嘅保安阻攔，話因為有幾個民主黨成員就地溝油事件示威，所以要閂咗嗰度新設嘅閘門唔畀人通過，激到梁耀忠紮紮跳，大鬧行政署怕得要死，據理力爭下，行政署先安排一名保安「押解」佢喺政總左穿右插後返回立法會，被激嬲嘅阿忠話呀，立法會10月復會後一定跟進。
查實民主黨元朗區議員黃偉賢同屯門區議員陳樹英，噚日去立法會就關注弱能人士老年化問題開會時，同樣遇上狂風大雨，但政總保安堅持唔放行，搞到佢哋要兜路濕身，連趕住放工嘅立法會議員助理一樣唔畀行，狼班子唔得民心，點會冇原因？