俾曼聯新舊領隊當係草嘅香川真司（圖），今季一返到娘家多蒙特就被當成寶。上周六呢位25歲日本國腳中場事隔兩年後再幫蜜蜂兵團踢德甲，雖然離開咗咁耐，但都冇生疏，一落到場就融入球隊，仲喺完半場前射入1球，最終助多蒙特主場贏弗賴堡3:1，兼且帶挈買[-1]「主勝」嘅球迷贏錢。多蒙特教練高路普賽後話：「香川呢場波踢得非常好，仲踢到抽筋㖭。我哋知道佢好識得踢波同埋製造到特別氣氛。」高路普咁講，擺明係寸曼聯前任領隊莫耶斯同埋現任領隊雲高爾唔識用香川真司。同日拜仁慕尼黑主場對史特加，由馬里奧葛斯及傷癒復出嘅列貝利各建一功贏2:0，但就唔好似多蒙特贏埋盤，只係開[-2]「和局」，開季踢咗3場聯賽仲未贏過盤。
識睇，一定係睇足英台【英波Live】：
http://soccer.appledaily.com
http://bit.ly/engballlive