開鑼日畀幾位外籍大騎師玩晒，繼杜利萊及潘頓起孖後，雷神第八場亦都贏「御皇鷹」埋齋雙喜臨門，之前他於第三場憑「金滿載」捧走特首盃落袋。
大摩馬房之「御皇鷹」之前未贏過，估唔到踏入第三季在港服役，用番上季騎過一次之雷神，可以清脆利落地大熱開齋。今勻亦都係「鷹」系自上季以來首度報捷，大摩冧到馬主中巴後人顏傑強男爵鬼咁開心，凱旋門仲見到今季已經撤出澳門之細摩，佢同大摩相擁互賀，兩兄弟笑到見牙唔見眼！
同場次熱門係「愛的呼喚」，馬主郭富城一早於廂房訂咗枱，今日呼朋結友入場打氣，可惜愛駒鬥落唔係太勁，只得第三，令到城城有啲失落。此駒上季尾至今連續四場搏輸，全部得二二三三，不過城城話跑馬冇實贏，對「愛的呼喚」今次得季軍已滿意；而今場亞軍是「永同天下」。