英國名廚Jamie Oliver喺銅鑼灣Midtown開嘅意大利餐廳Jamie's Italian唔經唔覺都開咗成個月，可惜至今Jamie真人都未曾來港跟粉絲見面，就連去過英國受訓兩個月、兼且喺三間分店實習過嘅餐廳總經理Stella，都未見過Jamie一面，佢亦好期待Jamie可以來港咁話。
Stella講返過去一個月嘅餐廳成績，雖然好多人投訴訂唔到位，但其實餐廳做walk-in客為主，訂座只佔兩成。以呢一個月平均計算，入座率約八至九成，假日同繁忙時段就唔使諗，一定要排隊等。
呢間餐廳算係走大眾化路線，Stella透露，人均消費唔係特別高，約250至300元。有別於一般餐廳，Jamie's Italian冇收加一服務費，客人可以隨意畀貼士侍應。
收貼士等於一個月糧
Stella兩位侍應同事Justin同Race異口同聲話，過去一個月袋到嘅貼士金額，幾乎等同佢哋嘅月薪！平日大概有一半以上嘅客人會畀貼士，至於周末就有七至八成人客都畀。話明貼士，金額當然浮動，主要因應客人覺得整體服務水平如何，粗略估計，貼士大約等於客人總消費一成。
Race與Justin冇去過英國受訓，只喺香港密集式受訓兩星期。除不停試菜，學習餐廳食材點分之外，成班人仲要喺香港周圍走玩city hunt，藉此加深認識，增強團隊精神。香港店𠵱家有70至80名員工，仲會繼續請人。