由四眼陳同短髮陳，再到𠵱家嘅光頭陳，公民黨陳淑莊Tanya都依然係未婚一族，但佢噚日43歲生日嘅願望，竟然係「擺酒」成功，莫非佢悄悄同人撻着咗，就嚟好事近？查實佢口中嘅「擺酒」，並唔係大家平時去酒樓食乳豬嗰隻擺酒呀，而係響應佔中發起人戴耀廷呼籲，一旦人腳齊晒、時機又到，就要準備開枱「去飲」，幾多圍都冇所謂，最緊要人多熱鬧，話畀中央聽，好多人支持「去飲」！
而喺參與呢場「盛宴」前，Tanya呢位壽星女都喺噚日正日朝早，先陪媽媽去飲茶，晏晝則去參與佔中黑布大遊行，夜晚約埋三五知己食飯，慶祝吓首個光頭下嘅生日。