上期本欄教大家，辨別大市能否再升的方法，提供了大市暫不能再升的初部證據，筆者都話腳痛旅行團信唔過，尤其係9月3日狂升600點係淡友投降居多，通常升勢都不能持續，說是遲那時快，上周三已經散晒，仲連大升日的底部都跌穿埋。其實這個調整，早於8月尾已露端倪，相信當時已有唔少人睇淡，但那日一bar大升，令淡友轉睇好，好友睇得更好。最後，才一網成擒，這就是市場先生的厲害，亦引證了德國股神科斯托蘭尼的名言：「二乘二等於五減一」，目標一定可以到達，只是中間的路徑不是一條直線。大市明明要跌，卻先來一個大升，9月3日，成交過千億元，係公佈滬港通消息以來新高，期指更誇張，由開市升到收市，係過去兩年的最大升幅，試想想如閣下是淡友，已有淡倉在手，能捱這一天嗎？
提防裂口急跌
自己手上的系統，早有調整訊號，早有做對沖，亦連續兩期以「升市的第一個警號」、「反恐第一擊」為題，叫大家揸四成現金，等調整才撈，但老實講，我都一樣係被市場洗腦的股民，9月3日一天大升，我唔敢睇得咁淡，亦加了一成貨。結果，口中的肥肉又被咬回一截。
講咗咁多，除總結教訓外，更重要的是同大家分析市場參與者的心理狀況，去推敲後市。過去一周，好友淡友都一網成擒（細股炒家例外），可以講，9月3日的升市，係要挾走淡友的最後廝殺，這種手法，通常唔止跌900點（期指由高位跌了900點），形態上就似2007年1月22日後的變化，9月3日就似2007年1月22日，而2014年9月10日的跌市就似2007年1月26日的裂口下跌。2007年那次調整共跌了2,445點，我唔敢講今次會跌咁多，但形態上係有點相似，跌唔跌到咁多，可容後再談，但2007年那次跌市歷時一個多月，只係跌頭一截及尾一截比較急，中間大部時間反覆微升，這點才是今期我最想講的。由於短線好友淡友已一網成擒，大市已無動機，再去左殺右殺，所以大市最多會試試中長期好友底線，即係借外圍消息，像炒美國加息，炒蘇格蘭獨立等等，做一做底，然後「作」勢反彈，令人感覺係唔係見了底。2007年就足足令人胡思亂想了大半個月，才裂口下跌，四日跌1,000點，完成調整，再展升浪。
這個「作」勢反彈期，係用來養羊的，養來作啥？當然係養來劏，而最後四日急跌，就係那把劏羊刀。這星期阿里巴巴上市，斷估唔會跌得太誇，甚至開始「作」反彈期，phone in節目好快就會問乜乜冧巴係唔係見咗底，乜乜冧巴買唔買得，這個時候好有機會就係養羊期，到時入市要特別小心，一係就要有「就算四日跌1,000點都唔怕」的心理準備，例如入一些低都唔怕，你跌我仲入多點那種好股，就好像本地地產股等，一係索性唔見急跌就唔入，咁就萬無一失。
咪住！唔係萬無一失，萬一那個「作」勢升，唔係養羊期，係真升，唔買咪笨？唔緊要，作勢升之時，大家減點貨，再撥出少部份錢買槓桿衍生工具，張士佳睇錯，有槓桿補住，睇中，閣下就慳咗唔少！
張士佳