蘋果嘅iPhone 6及iPhone 6 Plus上星期五下晝三點開始接受預購，由於中國喺蘋果第二輪預售地區仍然「冇影」，iPhone炒家嘅非理性亢奮即刻飆升，炒家希望兩部新iPhone 6喺先達嘅回收價承接力一路企穩，打工仔甚至係全家總動員鬥快上網搶iPhone 6！就連港股都受呢股「phone潮」影響，因為蘋果新iPhone預售時間喺收市前一粒鐘開始，喺嗰段時間大市成交曾經跌到得番61億元，本地股民轉軚炒咗iPhone先。
無論係炒iPhone或者炒股，雖然投資嘅方法大大不同，但入場前清楚了解投資目的亦好重要。資深投資顧問Mark D. Cook話，將投資者基本可分為兩大類包括inny同outtie，兩者性格南轅北轍，但同樣有斬獲。
Inny嘅投資者，佢哋既鍾意試新嘢同刺激，享受親歷其中多過細讀觀察，不問價追買。屬於inny嘅投資者，佢哋投資組合可以話乜股都有，波幅越大就覺得越刺激。所以要承擔風險唔少，同時佢哋未必嚴守止賺，成日都覺得可以再賺多啲！
Outtie類型投資同inny剛剛相反，佢哋傾向思考、分析後再靜候最大回報時機。簡單講係穩陣派，投資策略首要將風險降到最低。呢類投資者嘅組合好一致，同埋嚴守止蝕。
C+B
本欄逢周一刊出