歐洲最強同花順？但𠵱家唔係5人足球，係踢11人喎，融入唔到嘅話，咪好似皇家馬德里咁，有前冇後，聯賽兩連敗變Joker囉！上星期六西甲，皇馬主場鬥馬德里體育會，「銀河艦隊」當然希望報番西超盃嘅一敗之仇啦，點知以1:2輸多場，踢咗3場聯賽1勝2負，我求大俠真係要抽到iPhone 6 Plus先可以喺積分榜搵到皇馬嘞！
皇馬呢場排晒基斯坦奴朗拿度（7號）、卻奧斯（8號）、賓施馬（9號）、占士洛迪古斯（10號）同埋加里夫巴利（11號）呢條超級同花順出嚟，擺大個頭，想靠主場氣勢搞掂馬體會。點知皇馬有前冇後，防守死球問題未解決，馬體會10分鐘開出角球，堤亞高文迪斯近柱一頂破網。喺西超盃時，馬體會已經試過用角球攻勢入波，但皇馬似乎冇吸取教訓。
雖然C朗喺26分鐘博到12碼，操刀射入幫皇馬追和，但馬體會之後企穩陣腳，頂住皇馬嘅反攻。換邊後，皇馬調走賓施馬同巴利，換入查維亞靴南迪斯同艾斯高都作用唔大。反而，馬體會靠後備入替嘅阿達杜倫射成2:1奠勝。
C朗心淡想去曼城？
皇馬又輸畀馬體會，冇面事小，失分事大，開季踢咗3輪得3分，錄得兩連敗，𠵱家排喺積分榜嘅下半版，開季冇耐就俾同日贏波嘅巴塞隆拿拋離。教練安察洛堤賽後都係「耍太極」，話上半場踢得好，但死球失誤就葬送比賽，佢有信心好快解決到球隊嘅問題。另一焦點係隊長卡斯拿斯俾主場球迷噓。卡斯拿斯話：「如果真係有人噓我，我要接受，然後努力訓練，希望改進。我作為門將，對嗰球角球失波都有責任。」
另外，英國傳媒又話C朗見到班戰友一個一個咁俾人賣走，踢到心淡，可能季尾返英超，有機會去曼聯、車路士或曼城，連巴黎聖日耳門都贒住佢。雖然C朗下年都30歲，但據報皇馬要買家至少開6,000萬鎊（約7.6億港元）先肯放人。不過，據報如果C朗轉會，佢會要求50萬鎊周薪！人工高到咁誇張，相信啲英超球會都要諗清諗楚。
識睇，一定係睇足英台【英波Live】：
http://soccer.appledaily.com
http://bit.ly/engballlive