眼見幾個主要對手韋達、雷神、杜利萊先後贏馬，冠軍騎師潘頓忍到第五場四班賽終於大爆發，佢騎住容廐「傲飛星」呢隻上屆拍賣馬，示範畀大家睇咩叫恐怖後勁大超班贏馬。
今場「傲飛星」出閘唔快，跑最短途1000米直路賽，沿途包尾大讓賽，200米處仍落後甚遠，以為輸梗，最後100米至叫做開始有走勢，當時潘頓先打兩鞭撻着座騎，然後將佢由大外欄抽出搵位衝，拉士50米「傲飛星」即刻自動撲上，喺亞軍「秋月春風」同季軍「善喜」之間罅位一竄而上，就此短馬頭位險勝，爆出15倍冷W開齋，贏馬過程好鬼誇張，評磅員賽後唔加佢十分、八分就假！
上季「傲飛星」由韋達騎兩次都輸，今場佢騎「秋月春風」，前駒益咗潘頓，反為「秋月春風」則繼續冇運，輸最後一步又係做二奶，四歲馬累積四次跑第二仲未贏過。