蘋果教父喬布斯sell iPhone、iPad等等新科技產品有一手，估唔到sell公司手段都好高明。現任行政總裁庫克接受訪問時就憶述，當年喬布斯點樣sell蘋果，令佢心甘情願拋低Compaq，轉投蘋果懷抱。
庫克1998年加入蘋果，佢話當年同喬布斯見面，5分鐘就已經掃除所有疑慮，決定要同喬布斯合作。庫克話，本來覺得喺Compaq好開心，所以拒絕咗喬布斯幾次；但喬布斯好堅持，庫克唯有會一會佢。
初時諗住見吓，點知一見面雙方就好投契。喬布斯同庫克講，打算100%轉投消費市場。當時業內人士都唔會諗到喺消費者身上賺錢，一味只會做服務、儲存同埋企業等方面業務。庫克覺得呢種盲從嘅心態唔係幾好，因此，喬布斯提出嘅方向就好啱庫克。
庫克話，當時覺得可以同喬布斯合作，而且係千載難逢嘅機會，腦入面有把聲叫佢去馬，於是就跟隨直覺走。