【記者姚國雄報道】港大副教授何式凝與年輕人談性論愛30年，坦言對接踵的荒謬香港人事「唔OK」、對只簽名撐學生卻靜待宰割命運「唔OK」、對在香港談戀愛卻不見未來更「唔OK」。渾身不自在的她，紋了眼線預備「去飲」，並與兩位好友創辦「未來民主大學」，豐富公民社會內涵。撐罷課的何式凝將在罷課集會上，為情愛與民主談一課。
為政改與佔中站出來的多是法律與政治學者，如今連教性別情愛的港大社會工作及社會行政學系副教授何式凝也宣佈佔中。她形容，眼下香港令人抑鬱，悲憤得難以言喻，此刻不能再計較自己是否搞開民主：「最重要係想唔想行出嚟，多一個人就係多一個人，我哋唔係等緊三子去拯救我哋。」
她認為，自己窮一生研究的情慾關係也建基於民主與公義原則：「我講嘅係關於民主與個人生活關係……極權嚟到時，佢係唔會考慮你受歧視，唔會尊重你係一個個體，亦唔會尊重diversity（多元）。」而極權巨人來到，連幸福小情侶也不能倖免：「我想像唔到平凡小夫妻可以點生活。因為都冇將來，你夠唔夠膽生仔呢？生咗仔，你個仔接受啲乜教育呢？你點樣面對未來社會嘅一切？」
「極權嚟到時，佢係唔會考慮你受歧視，唔會尊重你係一個個體，亦唔會尊重diversity（多元）。」
土生土長的何式凝皺着眉，大嘆香港越變越荒謬，由恐怖嘴臉公佈的恐怖熱線，似是疑非的包裝，一聽便知歪理連篇：「好多人嘅說話，我真係聽唔落，一聽就激氣，我覺得到咗自己嘅臨界點，真係頂唔到……發夢都諗唔到有條咁嘅恐怖熱線，超乎我嘅想像。」
7.2的511人被捕後，何式凝拒絕加入「學者撐學生」聯署，內心的掙扎造就她今日的決心：「我係好唔能夠簽支持學生嘅聯署，我知道自己唔OK，但好多人都叫我簽，聯署信幾次傳到嚟，我同自己講『簽×咗佢啦！』……如果我簽名支持，我一定要有心理準備，我都係會願意同學生一樣會佔中和被捕，或者做番啲嘢，我先至簽得落，否則我會覺得自己好虛偽、好樣衰。」終於，她決定佔中：「我覺得如果佢哋（學生）都可以afford到被捕，點解我哋唔可以……我覺得一定要將我僅餘嘅青春奉獻給馬路。」
舒服的日子不能爭取民主，何式凝說要接受生活不能如常，更要克服人類墮性，否則民主豈非沒代價？「我哋都有一種『不如順從、不如袋住先、不如低低哋慣一鋪、食啖安樂茶飯』心態，只要你開動嗰個掣，攞番嗰啲封建包袱、小時修女學校教你嘅嘢、屋企壓迫你嘅嘢出嚟，你都可以諗到，只係其他人就攞咗呢啲嚟升官發財，但我哋讀咁多書，就係希望我哋發揮到人性光輝」。紋了兩眼眼線以免「溶妝」，何式凝將與光頭三子，迎接強權水炮。