阿里巴巴上市路演今日終於殺到香港，地點係九龍站嘅六星級酒店THE RITZ-CARLTON，即係歌手李玟（Coco）2011年搞世紀婚禮嗰一間酒店。聽聞，今次大會保安非常之嚴密，會場部份地方會封住，不得內進，到場嘅賓架、芬佬亦經過嚴格篩選。
香港呢一站，阿里嘅橙紅兩隊都會到齊，即係阿里巴巴所有巨頭都會現身。阿里公關大員唔肯透露路演詳情，唔單止對參與人數、酒席數目等等一律封口，連靈魂人物馬雲會否到場都唔肯講，只係話會預留位置畀傳媒等。
阿里對呢間酒店似乎情有獨鍾，之前支付寶同八達通合作，都係喺呢度舉行。香港站之後，由副主席蔡崇信、CEO陸兆禧帶領嘅橙隊，就會離開香港明天到新加坡，紅隊就會留多一日再啟程飛去倫敦。