雷神上季十月尾至嚟香港客串，錯過咗開鑼跑特首盃之機會。今季佢由開鑼日開始上陣，第一次爭特首盃，編為第三場一班1200米，雷神即刻憑苗廐「金滿載」勇奪桂冠，並從頒獎嘉賓林鄭手上接過新馬季第一盃。
「金滿載」以往喺谷草光芒四射，由於評分不斷上升，故上季尾起轉往田草搵新出路，不過一直打開唔到田戰勝門，只係跑過幾次位置。今仗休後復出，用番贏過佢之雷神，11檔起步叠埋心水同對手鬥拉士，記得於上季尾同程，「金滿載」曾後上不及，以頸位之差跑第三，然而汲取該次經驗後，雷神今仗發揮得出色，未到終點已有時間望住內側的座騎，正宗「睇定嚟食」，爆出7.9倍半冷W。而「醒目波幅」及「幸福指數」則分列亞、季，至於殿軍為「左右逢源」。
今場最令人吃驚是大熱門2.0倍的「神舟十號」跑落冇前冇後，早段喺三叠見韋達猛「隊」，一直埋唔到欄，最終入直路冇耐已經力弱墮退，並以尾二過終點，上季七戰五冠一亞一季的超新星，服役首度失三甲，正如網民形容，神十失靈墜毀鳥！