【壹週刊】就嚟又到十一黃金周，不過唔駛等到大陸長假，今時今日香港，去到邊都總有一堆強國人係左近。以前強國人鍾意拖住一篋篋金牛去廣東道血拼，而家連北角平民區渣華道都被同胞佔領。每日午飯及晚餐時段，渣華道都會被一架架坐滿大陸人嘅旅遊巴塞爆，浩浩蕩蕩嘅強國旅行大軍一落車，就紅燈都唔理，衝去到對面嘅國賓商場排隊，究竟呢度有咩咁吸引？
「呢度咩嚟？人民大飯堂囉！每晚都有二、三千人嚟架！」該名着制服嘅男人，相信是商場的保安員，佢一邊講，一邊安排同胞一批批落去商場地庫，原來呢個咁隱蔽嘅地方，開咗間酒樓叫「盈通閣」，無餐牌無得揀專做大陸團生意，入面座無虛席，八餸一湯相當驚嚇，包括有辣汁白豆腐、腥爆魚乾、榨菜紋榨菜、白焓紹菜……，最正係仲有香港特色的辣魚蛋和茄汁腸仔，來自福建嘅團友就擰晒頭：「很難吃！全部都很難吃！」難食又照啃？「都沒得選。」他們報的是二日一夜千多元的平價團。有得食就食住先啦，無得揀，完全符合國情。
除咗飯餸見到唔開胃之外，用餐時間原來要限定在十五分鐘，極速啃完後，侍應潮水式控制人潮，將一團團鴨仔趕走，他們下一站就急急腳衝去到北角碼頭，坐船欣賞維港夜景，繼續鴨仔團嘅旅程。
iPhone版下載： http://goo.gl/1SDaWF
Android版下載： http://goo.gl/xfQS8D