雲高爾變陣，改踢4-4-2，曼聯終於打開英超的勝利之門！紅魔周日在奧脫福迎戰昆士柏流浪（QPR），靠迪馬利亞、安達靴里拉、朗尼及桑馬達各建一功，以4:0大勝對手。
經過開季聯賽3戰不勝後，雲高爾今場放棄3中堅陣式，轉踢4-4-2。他在開波前接受訪問表示：「我們將會踢4後衞。如果要踢5個的話，我不夠人用，因為全都受傷了。基斯史摩寧快將復出，但狀態不足，菲爾鍾斯亦正在養傷。」莊尼伊雲斯與小將泰萊布力基扼守中路，拉菲爾達施華傷癒任右閘，新援馬高斯盧祖為左閘。
曼聯今場使用菱形中場，荷蘭新兵戴利白蘭特任防中，迪馬利亞偏左，安達靴里拉偏右，桑馬達為進攻中場，支援雙箭頭的朗尼及尹佩斯。哥倫比亞射手法卡奧則先列後備。賽前，曼聯名宿卜比查爾頓向前紅魔中堅、現效QPR的里奧費迪南致送獎座。
「天使」罰球開紀錄
曼聯上半場佔盡優勢，取得近7成控球，但初段射門較少，只有桑馬達接應靴里拉的傳中後射高。24分鐘，曼聯在禁區頂偏右位置獲得罰球，擅長左腳的迪馬利亞處理，直彎入網。
「天使」的首個曼聯入球協助球隊開紀錄。31分鐘，迪馬利亞左路傳中，但尹佩斯頂波底高出。32分鐘，曼聯差點大意失波，盧祖與門將迪基亞默契不足，迪基亞出禁區解圍失誤，QPR的馬菲菲臘斯射空門，但他射得太正，被伊雲斯及時封阻。
36分鐘，曼聯擴大領先優勢。迪馬利亞左路推進，妙傳交叉走位的朗尼，後者入禁區起右腳一射，雖然被QPR守衞擋出，但朗尼截到皮球，並橫傳給靴里拉，這名西班牙中場遠射入網，攻入加盟後的首個入球，曼聯領先至2:0。完半場前，隊長朗尼接應靴里拉的助攻，在禁區邊射近柱入網，助球隊拉開至3:0。
法卡奧後備入替
換邊後，QPR有個破蛋良機，卡蘭積卡在無人看管下施射，但被迪基亞救出。58分鐘，迪馬利亞左路妙傳，里奧費迪南包越位，桑馬達輕鬆射成4:0。67分鐘，今夏由摩納哥外借加盟的法卡奧入替，換走入球功臣桑馬達，但曼聯無再入波，維持4:0完場，取得今季首場勝仗。
文：咖喱
識睇，一定係睇足英台【英波Live】：
http://soccer.appledaily.com
http://bit.ly/engballlive