本地大孖沙捐錢畀大學認真無遠弗屆，恒隆地產（101）主席陳啟宗家族慈善基金早前一筆過捐3.5億美元（27.3億港元）畀美國哈佛公共衛生學院，「名牌潘」潘廸生亦捐1,000萬英鎊（約1.26億港元）畀英國牛津大學，潘廸生牛津大學中國中心大樓上周揭幕，名牌潘更與劍橋公爵威廉王子同場㖭。
講到本地大孖沙向大學捐款，過去十年，超人李嘉誠、恒地（012）主席李兆基、新世界發展（017）創辦人鄭裕彤算係比較積極同埋高調。超人2005年一筆過捐10億元畀港大醫學院，港大將醫學院以李嘉誠命名，引起嘅風波令人最印象深刻，不過之後越來越多大孖沙高調捐款畀各間大學就真嘅。
陳啟宗早前大手捐27.3億元畀哈佛，成為哈佛創校378年以來最巨額嘅一筆捐款；以單一捐款者而言，超人應該係佢鄉下汕頭大學嘅主要捐款者，根據李嘉誠基金會網頁資料，基金會至今向汕大捐款超過62億元。
邵逸夫對教育貢獻良多
四叔與彤叔呢兩位老友記，向大學捐錢嘅作風都有啲相似，內地與香港嘅主要大學都會捐。北大、清華、上海復旦三間知名大學，四叔都有捐錢，共捐出約6億元，又捐過4億元畀科大。
彤叔最大手筆又比較高調，應該係旗下新世界出資13億元助中大興建教學酒店與教學樓嘞。
不過，要講對大學捐助最不遺餘力嘅大慈家，肯定係已故「影視大亨」邵逸夫，「逸夫樓」就遍佈中港嘅大學校園。
李華華
mailto:[email protected]
