【本報訊】有得揀，拒絕「籮底橙」。沙田第一城屋苑內僅有百佳超市，涉經常出售霉爛蔬果和過期牛奶，輪候結賬又動輒近一小時，居民昨發起罷買抗議，以行動抵制霸權，有顧客指行動令店內人流大減九成。為挽回聲譽，百佳分店員工積極檢查貨架並即時補貨，又開放所有收銀櫃枱。
記者：佘錦洪
為應付居民怒火，百佳分店員工昨全民皆兵。《蘋果》記者現場所見，備受批評的水果檔附近有約六、七名員工巡邏，並不時拿起水果檢查，發現有腐爛會即時撿走，爛橙、爛蘋果絕迹貨架，旁邊放有多箱未開封鮮果，隨時補貨。凍櫃的鮮奶亦安排員工專門整理，較早過期的被放到前方，方便顧客選購。
居民指以往揀生果會被罵
面對結賬「嘆慢板」引致人龍的指控，分店內十個收銀櫃枱及四個現金快線罕有全面開放，員工即使沒有顧客輪候仍不敢擅離崗位，務求「秒殺」人龍。經理又親自到場監督，每當見到有疑似記者以手機拍攝即大為緊張。而位於舖位旁、平日借用作卸貨的商場卸貨區昨日已被圍欄圍封，有保安在場看守防止有人「偷雞」上落貨。
支持罷買行動的楊小姐表示，以往結賬要等至少40分鐘，「每次入去想買，見到條龍我都會放番啲嘢走」，補貨緩慢就算想買蔬果亦經常買無可買。她又指早上路過卸貨區時都見到滿地污水及載貨紙箱，「都幾污糟」。吳小姐亦指應抵制百佳，但承認屋苑內選擇較少，街市因貨物流動性不大，「都唔會平好多」。有支持罷買的居民路過時，忍不住以手機拍照上傳社交群組，指行動令人流大減九成，大讚居民「好波」。
即使日前屋苑多處已張貼罷買告示，但仍有居民到場幫襯。居住在第一城20年的袁太表示，百佳經常出售爛水果，「爛到出水都有」，若動手挑選更隨時被職員「鬧到七彩」，又試過排隊結賬近一小時。她直言昨日分店內完全無人，不但任由她揀貨，付款時更不用排隊。不知道有罷買的陳女士稱昨日鮮貨「幾靚」，又指以往櫃枱從未試過全開。
自第一城商場翻新後，屋苑內百佳超市由兩間變為一間，不少居民投訴百佳出售的生果發霉、蔬菜腐爛，甚至售賣過期牛奶，懷疑是因為人手不足無人整理貨品。居民委員會日前張貼通告，呼籲居民昨日罷買在第一城商場內的百佳超市，並禁止百佳使用卸貨區36小時，若沒有改善，會考慮升級行動將禁止落貨時間延長一周。
街坊鬧服務差
楊小姐
「每次入去想買，見到條龍都會放返啲嘢走；落貨區幾亂，好多污水、空盒放喺度。」
吳小姐
「平時買嘢要好耐，樣樣都要排；街市都唔會平好多，流動性唔大，又唔夠全面性。」
蘋民洗版
Benjamin Yeung
今日買餸經過此店，人流確實比平時weekend少咗90%以上！第一城居民好波！
Wallace Lai
有橙，真係唔食？唔反抗就食到2047啦。
Tik Yu
應該全港都要咁做啦。
Kwan Kwan Yip
中國人的缺點！唔團結！一樣有人走去幫襯！
Ka Shing Li
第一城居委會，proud of you！
Sky Lam
都未計百佳逼死咗幾多小店。
節錄自蘋果日報facebook留言