《動主播決戰2014》噚日喺新蒲崗Mikiki商場隆重舉行，大會請嚟「影壇女皇」劉嘉玲及「靚聲王子」古巨基擔任嘉賓，仲有森美同莊思敏做星級評判添！
重量級嘉賓之一的劉嘉玲，甫現身即引嚟全場哄動，被問到對一班參賽者嘅評語，嘉玲話：「我覺得佢地都表現得好有水準，起碼比我好」，更大放貼士：「主持人又好訪問人又好，起碼要自己做左功課先，胸有成竹咁去訪問無論邊個都好」！
至於古巨基，被問到有甚麼主播心得可以分享時，他就憶述自己初出道做娛樂新聞主持的情況，笑指：「我覺得果時都幾受歡迎嘅！」話當時經常被大明星們遊花園，但覺得無太大所謂，指：「有時大家都係娛樂吓人，訪問開心咪得囉」，仲搞笑地叫大家上網睇返佢做主持的片段，一定可以穫益良多咁話！
星級評判森美及莊思敏，亦對動主播參賽者評論一番，其中森美一出場便大放笑彈，笑指如果要4號浩嵐撒嬌，等於叫古天樂「扮嗲」！
現場所見，一眾參賽者都有超水準演出，當中以7號鰻魚聲勢最強，每次出場例必有大批粉絲吶喊助威。但講到受歡迎，則由10號點點，以高票姿態奪得「最受蘋民歡迎獎」！
經過一輪激烈比拼，動主播冠軍終於誕生！3號Kinki憑着一路以來嘅穩定發揮，甜美笑容及伶俐嘅口齒，成功登上寶座。而亞軍及季軍，分別由1號UoG同2號Noris奪得。
決賽尾聲，現任動主播出場表演一節精彩歌舞，為全日活動掀起高潮！
動主播召喚2014賽果：
冠軍：3號林雅軒Kinki
亞軍：1號余余傲芝（UoG）
季軍：2號黃嘉寶（Noris）
最受蘋民歡迎獎：10號楊民翠（點點）
嗚謝：Mikiki商場全力支持 Elite Makeup
【動主播召喚2014】網址： http://anchor2014.appledaily.com