Hi！各位朋友，又係我賭仔馬華力。禮拜馬季開鑼，揀隻「津津樂道」俾大家參考。
季初跑馬前輩教落，狀態為先，因為隻隻馬都係第一Run，任你幾高質素，狀態未FIT識飛都冇用。所以好多馬迷都會吼季前試閘有過表現嘅馬。
但試閘同真實比賽畢竟有分別，好似曼聯咁，季前熱身賽贏過皇馬、利物浦同華倫西亞，踢到識飛咁。但開季三場聯賽兩和一負，聯賽盃更大敗予英甲球隊米爾頓凱恩斯○比四，如果揸住佢啲熱身賽成績嚟賭，輸到瞓街都似。
所以季前試閘上過名嘅馬，都要識得揀，一定唔會隻隻得。馬華力反而覺得上季銳開嘅馬，狀態仲有機會喼到今季初。好似第七場「津津樂道」，上季轉投賀賢後，贏馬姿態有目共睹，首次贏馬因為好遲先有位，贏四分三身位好似好險，實質大把在手。果然再出無遮無擋，贏到收韁返嚟。既然隻馬銳開，使鬼試閘嚟磨起狀態咩！