46歲嘅1986年港姐亞軍吳婉芳，有防腐美女之稱，已經係三名子女嘅媽媽，長子更已19歲，正讀大學主修法律，但芳妹睇落得30歲左右，真係叫啲港女好葡萄。
仔女大咗就梗唔黐父母，芳妹唯有同老公胡家驊自己搵節目，跑吓馬仔就最爽嘞，雖然冇耐前愛駒「喜蓮芳芬」退役，但胡家驊仲有唔少馬，「喜蓮標緻」、「喜蓮巨星」就將會喺開鑼日上陣。由於呢對馬今次都縮程上陣，估計會因此成為冷門，不過兩駒嘅練馬師方嘉柏同告東尼，都係冠軍級人馬，絕對唔會立亂部署，梗有佢哋嘅理由。好似方廐「喜蓮標緻」，今季連大閘都唔試，刻意令佢有更強新鮮感應付1200米，隻馬上季尾可以喺1400米三級賽精英盃，孭到極沉重嘅133磅一放到底贏馬，根本就有速度喺短途爭雄。
至於東廐「喜蓮巨星」上季於田草1800米勝出，今次跑1400實受忽視，但睇番佢來港前其實贏1200、1400米，最近試1200米泥閘亦跑到第二，自購馬踏入第二季，估計有唔少進步空間，睇嚟胡家驊同芳妹又有機會拉頭馬咯！