英超放假一排，餓波者自然轉睇轉賭歐洲國家外圍賽，其中有一場最大比數，乃直布羅陀對波蘭，比數0:7，就像巴西輸德國的比數，但我其實覺得輸得少，點解？
直布羅陀人口3萬有找，少過太古城，面積7平方公里有找，細過九龍半島，球員幾乎全部業餘，正職分別為船務、消防員、差佬、海關、文員、電燈公司等等，即係香港嘅「是他也是你和我」，呢班友隨時落修頓維園踢都會輸，國內唯一波地都係人做草場，你仲想點？
直記300年前屬西班牙、位處地中海出口要塞，遙望北非，呢個戰略要點當然被英國佬睇中。當年西班牙內戰叫英國幫拖，英國佬就圈咗豆潤地方作報酬，自此為英殖民地，同當年香港嘅遠東戰略類似，同樣亦發展得幾好。西班牙見到金蛋當然想收番，1967年直記全民公投，壓倒性話跟番英國都唔想跟「偉大但貪污嘅祖國」西班牙，西班牙絕不罷休，2002年又公投英西共同管治遭否決。西班牙佬眼中，直布羅陀絕對係英國走狗。
太古城咁多人似乎獨立又冇着數，於是繼續做殖民地奴才（麻煩范太飛去鬧爆佢好嗎）。直記煙酒商業稅低，英國賭波公司好多都搬去做基地，錢唔愁，醫療住屋福利佳，民皆有尊嚴。輸7球又如何？嚟緊對德國、愛爾蘭、蘇格蘭，唔買「其他」波膽都開電視支持吓。
梁栢堅
填詞人+彩池人