馬主N自澳洲渡假回港，準備新馬季九月十四日開鑼。佢每年都有新動作，新構思，於是約佢飲茶，探聽吓有乜新橋，本想遷就佢，預備卜定太古坊Butterfield's會所嘅，點知佢喺電話講：「前星期已經搬咗去上環，北角高檔商廈租金上升，上環近地鐵站嘅細商廈反而便宜一啲，而且與老友見面更加方便。」既然如此，便改去振邦大廈地庫嘅「波士廳」，呢間粵菜館好似係「好精伶」、「好精英」、「好合意」嘅馬主有關人士開辦嘅，餐廳牆上掛咗不少「好精伶」嘅圖片，老闆如非馬圈中人，焉會如此。「好精伶」年紀已長，今季想贏馬，並非容易，反而隻上季新馬「好合意」，據肥仔K研究其父系血統，乃日本長途泥地馬，日本拍賣價便宜，上季跑草地一千至千四米，只在千四米入位，輸得好遠，但如果今季在沙田跑泥地1650米至2000米之類，就有留意價值。
馬主N一坐低，就打電話向姨丈報喜，姨丈名下嘅澳洲馬是日在雪梨贏出頭馬，食完晏就上去姨丈寫字樓詳細匯報，姨丈寫字樓在那裏？咪就喺振邦大廈囉，所以馬主N猛話：「搬咗嚟中上環，真方便。」馬主N見左丁山戴住頂喼帽，就講起：「我在雪梨搵家庭醫生驗身，醫生話我吸收維他命D唔夠，慎防再老啲就會骨質疏鬆，佢話我在澳洲慣咗戴喼帽、穿長袖衫行街，其實係阻止吸收陽光及維他命D，叫我最好唔戴帽、着短袖衫行街喎！香港呢排天氣咁熱，事實上亦係咁樣着衫先至舒服，可惜我地男人難以效法女士，穿起短熱褲隨街行，甚至返工啫！」
此乃女士專利，男士唔恨得咁多。左丁山戴帽，並非防陽光，其實係防食肆商場寫字樓冷氣太凍，俾冷氣直吹頭頂，必定好快就流鼻水，唔防範唔得。今年氣溫特別高，七月份持續高溫，創歷史紀錄，到咗八月，九月初過埋中秋節嘞，仍然熱到飛起，人在家中，冇冷氣唔得，上班又如是。今年家中6至8月嘅電費，高達6,200元，創歷史新高，去年家中6至8月嘅電費係4,600元，比前年增加9.5%，估唔到，今年猛增26%，點搞呀？收到電費單，連忙與老婆召開家庭會議，佢話每早起身一掃地，就大汗叠細汗，故此全屋冷氣由朝開到晚。周圍問吓，個個老友都話6至8月電費大增，三四千元係閒事，連住在彩虹邨嘅信差阿美，都話佢間公屋嘅電費係1,700元。以現時氣溫走勢，9至10月嘅電費亦會有相當增幅。即刻諗出對沖辦法，就係買入中電（2號）及港燈電力投資SS（2638），博兩電今年電費收入上升，派息有望增加！