上季跑足一季，胡森馬房只贏得13場頭馬，差兩場先達標，首次接警告信，亦因為成績差，搞到唔少馬主離棄，家陣得19隻馬，好多人話胡森已經窮途末路，唔使等到三個季度唔達標，如果養馬量再跌嘅話，想繼續喺香港練馬會好艱難。
不過胡森今季有明顯轉變，唔想坐以待斃，過去佢嘅馬操練悠悠閒，但今季就好似趕住去打仗咁，已經有八隻馬喺季前試閘中勝出，最新鮮熱辣係明星馬「索咖啡」喺剛周五以極佳走勢掄元。
開鑼戰同嚟緊周三首次夜賽，胡森各有五匹馬共十駒列陣，小馬房擺出呢個「等錢使」嘅陣勢絕對唔尋常，其中開鑼日三班1400米嘅「風采」，上季最後一戰喺一哩後上取勝，遲熟馬有開竅跡象，唞暑後更覺成熟進步，本月3號試大閘，直路以強勁走勢追上奪勝，絕對係機會分子。記得05至06馬季，姚本輝馬房贏得10 場，養馬亦跌到冇20隻，當時好多人都睇死佢，但之後一季姚廐大反彈攞到24W，所以大家都咪咁快批死胡森。