上周有機會坐響旺角場嘅頂部傳媒區，同幾位有志投身體育記者甚至主持工作嘅朋友仔一齊講社區盃，本來都好哋哋，我撩吓佢哋講無謂嘢，佢哋又講番啲正經嘢。本來相安無事，直到隔籬港台嘅何老靜開咪，情況有少少唔同咗，因為兩位身邊嘅拍檔都無戴耳筒，所以呢佢哋竟然分心聽咗阿前輩講嘢，然後唔覺意模仿講番咁上下意思嘅說話，哈哈，簡直係俾老靜魔法迷暈咗。扮冷靜嘅我笑住諗緊點幫佢哋解穴之際，突然前面嗰一行觀眾席有兩位Uncle高談闊論，越傾越大聲，兩位入世未深嘅小拍檔直頭停埋口唔講嘢齋聽人講嘢！正呀我心諗，呢兩位阿叔嘅對話咁吸引，不如交個咪畀佢哋講啦！
不過我都係忍住無咁做，因為佢哋嘅發言入面有唔少粗口助語詞，我人肉幫佢嘟都應該嘟唔切，無計！
然後星期五睇亞視播港超聯揭幕戰時，除咗聽到徐老闆同柏霖仔肉緊講波之外，仲聽到現場球迷打氣同埋得閒一兩句嘅粗口，又幾有現場感喎。亞視咁難得有本地波播，不妨考慮吓啲新猷，譬如加多一條聲音頻道係無人講波嘅，淨係播現場嘅球迷聲就得，甚至響球場邊加個咪，俾各位球場阿哥派隊發聲，暢所欲言。當然一爆粗就out到下位，分分鐘可以發掘番幾位新進講波阿叔，為球圈帶嚟一啲新衝擊，尤其是家陣香港人咁鍾意懷舊，由叔叔們撫今追昔，好聽過後生仔齋上維基揾料照讀啦！
我一直有個疑問，就係點解NBA可以邊睇波邊播歌兼嗌名兼加鹽加醋都ok，但係足球場就唔得呢？有人話係因為安全問題，費事刺激到現場啲球迷搞事啦。不過呢個諗法家陣唔係幾啱用，查實呢一刻嘅香港，隨便一個街頭都可能有人因為雞毛小事先來口角繼而動武啦，球場分分鐘安全過街邊。本地球迷最大問題係發冷唔係發熱，若果有任何方法可以醫到冷感其實都不妨一試！始終，當年旺角球場阿叔鬧交導致有人從高處墮下嘅事件（好似又係亞視獨家拍到），都係個別事件箒。
KEYMAN
節目主持