麥兜陪伴大家超過10年頭，吳君如也做足「麥太」10年，她由當年未做阿媽，到如今女兒陳是知已經8歲，說君如沒有向麥太學習教女之道就是騙你的！「麥太」愛對麥兜講天馬行空的故事又呃又𠱁，君如則喜歡對兒女訴說自己的人生經歷，入行點滴，讓他們明白各種人生道理，麥太的幽默也是君如的大癲大肺延續，但愛子女之情卻始終如一。
撰文：溫敏芝
電影《麥兜．我和我媽媽》，由已長大成人的神探麥兜說起，麥兜憶起媽媽麥太一手栽培、悉心照顧，戲中麥太隱瞞麥兜扮中六合彩一段故事最感人，麥太對麥兜完全信任，日前君如在奧海城接受訪問時，說：「嗰part係全部戲嘅中心，我配麥太呢個角色配咗好多次，麥太好正，係個好有智慧、充滿哲理嘅阿媽，無論個仔幾蠢，都好有耐性教佢。」
「我係美女唔係怪獸」
在現實中，君如也有位8歲大的女兒陳是知，作為一位喜劇演員，平日大癲大肺，她會怎樣與女兒相處？她說：「有乜嘢事我一定會同佢講相信佢，講大話唔緊要，可能你有你嘅理由，總之自己有自律，麥太好幽默，我都幽默㗎。」君如指每年會分配好工作時間，囡囡不會投訴見面少，如果不用拍戲，會全天候照顧及陪伴她，每晚跟她講故事。
那君如算不算一位「怪獸家長」？她說：「一定唔係，我係美女，唔係野獸，我唔做怪獸，不過我覺得小朋友係要逼嘅，就算做唔到99分，都希望做到90分，如果我懶懶閒，乜都唔做，我覺得佢將來會怨我唔栽培佢，唔push佢，𠵱家好似正常學彈琴、畫畫唔算怪獸喎，呢啲係培養佢嘅氣質。」
囡囡冇問結婚問題
君如坦言與囡囡開始傾心事，囡囡最鍾意聽爸爸的歷史，她說：「佢會問點解你哋會拍戲，點解入呢行，我亦都會好誠實同佢講，我以前好憎返學，返學會遊魂，會偷同學曲奇餅食，佢好鍾意聽，覺得好有趣，我從來唔會隱瞞佢或者美化自己。」鍾鎮濤女兒鍾懿曾經問過父母為何不結婚，她的囡囡又有否這樣問過？君如說：「冇，佢都冇呢個概念，佢覺得已經係爹哋媽咪，唔使再問，其實婚唔婚禮只係個party，一個好嘅回憶。」問她是否需要這個回憶？她即說：「唔需要，我鍾意開party同朋友食飯，但唔鍾意呢啲，但係可能有一日覺得好想開嘅，咪再開個party囉。」
攝影：郭賢興
場地提供：The sky戲院
化妝：Midco Chu
髮型：Yoyo Hui@hip hair culture
服裝：Escape
