唔使錢去東京吃喝玩樂兼瘋狂鳩嗚（購物）咁筍？八方都想有咁嘅機會。日本潮物店JC Shop正籌備旅遊真人show，話會由金像獎級人馬組成攝製隊，今年11月到日本免費玩約一個星期，主持每日需按指示完成任務，除沖涼瞓覺，一舉一動都要上鏡，完成後有30萬𨨥（約2.2萬港元）酬勞，可以瘋狂鳩嗚。
JC Shop董事總經理莊天頌話，近期社會氣氛受假普選等政治因素影響變得低沉，希望藉真人show幫港人打氣，佢話筍工遴選標準係要「活潑開朗同唔好怕鏡頭」，主持招募喺呢個月28日開始，年滿16歲就可以參加，要拍攝一條一分鐘短片，半分鐘以主播形式介紹一件事或物，剩低半分鐘就自我介紹咁話。