「你買咗未？」唔好以為八方問你買咗噚日預訂嘅iPhone 6未喎，而係問今晚9點半開彩嗰1.5億六合彩你買咗未呀！1.5億可以做啲乜？夠你買26,843部價值5,588蚊嘅4.7吋螢幕16GB入場版iPhone 6喇！呢個「史上最高」彩金嘅六合彩，打工仔梗係唔會錯過做億萬富翁嘅黃金機會啦，仲連強國人都落嚟搶，呢幾日投注站仲旺過銅記啲名店，連屋企個賓賓都話要同班鄉里夾份落注，真係誇張。
大包圍一注中執4,000萬
呢個超級六合彩有成億半彩金，假如大包圍又真係一注中頭獎嘅話，咁又使唔使蝕？八方不妨幫家計吓數：六合彩中頭獎機會率係13,983,876分之一，大包圍就即係13,983,876注，10蚊注本錢近1.4億，獨中頭獎唔止穩袋1,000萬，仲未計6注二獎、252注三獎、630注四獎（9,600蚊）、12,915注五獎（640蚊）、17,220注六獎（320蚊）同埋229,600注七獎（40蚊），扣本後夾夾埋埋，仲可以執番成4,000萬㗎！
即係話如果有人大包圍買晒49個冧巴，一注中頭獎嘅話不但唔使蝕，仲可以小小哋穩袋4,000萬，夠買間假豪宅嘆吓！而今次亦係有史以來，首次有彩金多過大包圍本錢嘅情況！不過數就係咁計，唔好唔記得咁多人買，多過一注中頭獎嘅風險亦好大，隨時幾個人中就真係蝕到唔清唔楚！始終博彩有運氣成份，刀仔鋸大樹、以小博大就無妨；諗住瞓身落去、拎把電鋸去鋸棵樹仔，就分分鐘偷雞唔到蝕把米！
李八方
mailto:[email protected]
