前日有外電報道，話西環阿頭張曉明，上月底同泛民見面時，恐嚇泛民話泛民仲「活着」，就證明強國幾咁文明同包容，《蘋果》問過當日在場嘅人，證實小明係有咁講，不過唔知小明係咪心有不甘，西環噚日隆重其事喺網頁出聲明，不點名鬧《蘋果》用意惡毒，不過小明為乜唔直接點名反駁《蘋果》？咁就要睇埋份聲明落去，原來小明認有講過「還活着」囉，只係死撐佢當時係話，1997前唔係有人擔心回歸後支聯會「待不下去」咩，講呢啲嘢嘅人唔係「還活着」，而且活得好好咩？小明仲要攞番個尾彩話，誠實係做人嘅起碼原則，歪曲事實同斷章取義總係為人所不齒，不過八方要問，講過唔敢認、俾人踢爆又死撐、又係咪做中共幹部嘅起碼原則？