曾俊華司長嘅「完美風暴論」，陳德霖總裁嘅「三重打擊論」，言猶在耳。但未夠一個月啫，已經證明錯得離譜，佢兩位成日講加息威脅，請市民小心小心，好聽啲就話先知先覺同講定先，以免好似雷曼事件咁，俾啲無聊議員放馬後炮大罵財金官員「後知後覺」；難聽啲，曾陳等就係奉命唱淡，誇大威脅用以嚇阻佔中。
加乜鬼嘢息吖，歐洲經濟有衰冇好（英國除外），歐洲央行上星期宣佈減息，十月開始大量買入ABS（有資產抵押證券Asset-Backed Securities），變相進行量化寬鬆，於是歐元應聲大跌；美國會加息？咪諗嘞，上星期五公佈嘅就業數據，遠遜預期，聯儲局鴿派領袖耶倫又有大把藉口拖延加息，故此美國股市又創新高，今個星期一、二只係借勢調整。如南早專欄作家Jake van der Kamp話齋，距離香港萬里以外嘅中央銀行家，歐洲央行德拉吉與美國聯儲局主席耶倫決定香港樓價走勢。因聯繫匯率之存在及神聖不可侵犯，我地雖然通脹高，樓價不斷破頂，理論上應老早加息，但實際上仍然要追隨美國實施低利率政策，按揭利率低到2.15厘或更低，實際上係負按揭利率（因通脹率係4%），借錢有着數，儲錢落紅簿仔係笨蛋，買唔起樓都要買高息藍籌股或地產信託基金（Reits）嚟抵禦。
現行嘅僵硬聯繫匯率迫使市民入市買樓，睇政府差餉物業最新報告，過去七個月樓價升幅，以小型單位最為凌厲，政府將本港住宅單位分為五型。A型係431平方呎以下，過去七個月（下同）升咗5.2%；B型係432至752呎，升4.3%；C型係753至1075呎，升1%；D型係1076至1721呎，升1.2%、E型係1722呎以上，存貨及新供應量最少，跌0.03%。由此睇嚟，愈係平民住宅，樓價愈係升得多，中產置業，有乜辦法唔係怨聲載道吖。以租金指數計，過去七個月，A型升1.6%，B型升1.4%，C型升0.6%，D型跌0.3%，E型跌1.1%，又係對中產不利嘅，要知道，香港私樓住客，絕大部份係住在A、B、C型住宅，外來熱錢投資客，多數買大型單位（D、E型），買中小型單位嘅係本地人，政府雖推出三D辣招，還是壓制不了本地人對樓宇有剛性需求。政府倘若再推出更辣招數，受打擊最嚴重嘅一定係A至C型業主，與真正有錢人無關！