北京要硬銷人大落閘假普選，上月尾先去完北京開人大常委會嘅人大常委范徐麗泰，呢排不斷曝光做落閘方案嘅推銷員，不過范太噚日同傳媒講，嚟緊呢排唔會見到佢講政改，因為佢要即刻上機趕去美加旅行，重要喺和平佔中「去飲」之後先返。
為乜呢個咁關鍵時刻佢都要去旅行？范太話因為要為95歲嘅奶奶賀壽，佢個囝囝都會跟住一齊去，咁為老人家賀壽就真係唔走唔得，不過范太呢轉一去到10月2日先至返港，換言之國慶期間，佢仲身在美加啦！
連國家生日佢都唔慶祝，又會唔會俾人篤背脊？范太笑住話去到美加，一樣可以慶祝國慶嘅，即係好似當地啲華僑咁之嘛﹗