經過咗近兩輪國際賽，各地聯賽又再重開，大球會班國腳級球員呢段日子特別辛苦，感覺上好似無停過咁。其實，中小型球會同一部份開季唔多順嗰班兵亦唔好過，大把球隊喺無正式比賽嗰陣，會操得仲勁。老前輩曾經同我講過，有時操一課，辛苦過打3場波，我聽完心諗：「吓？究竟係唔係呀？定以前比賽同𠵱家都真係唔可以同日而語呀？」
「鄉紳」外援註冊好險
講開唔同，𠵱家喺馬會玩波，變化真係多咗好多，就好似連角球都可以玩大細咁。講到呢樣，老前輩即刻話今晚第27場英超修咸頓主場對紐卡素（上），角球中位數開10.5球，要「大」有1.82倍，分頭唔錯咁話；佢仲話兩隊都鍾意落底線出波，呢類打法嘅球隊角球一定多，仲約定我禮拜朝早去飲茶，飲完齊齊去收錢喎。咁鬼有信心，唔跟都唔得啦。
中秋節嗰日，好多本地球隊都早收，點知4點幾突然接到「鄉紳隊」嘅火炬智打嚟，話有兩個袋鼠仔嘅工作證有麻煩，搞唔掂的話，揭幕戰會打少兩件。我當時睇吓個錶都就快5點鐘，就叫佢定少少，聽日放完假先算，星期三再帶晒文件，拖埋兩隻「袋鼠」去入境處試多次。由於佢哋申請嘅係來港就業簽證，領證後都要持證人入境蓋章，先至可以生效；所以兩位攞完證就即去澳門，返嚟就有個就業證印，之後順利註冊到。火炬智趕完註冊打嚟話搞掂，仲話過嚟請飲茶，哈哈！
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive