台灣爆出大陸式地溝油事件，令人大吃一驚，香港美心餅店承認該店之菠蘿包有用到台灣地溝油，立即回收，停產，咁就已經弊傢伙啦，十幾年來，左丁山食過美心菠蘿包唔少，沙田陳太又打電話嚟嘈：「睇咗《蘋果日報》頭版，好驚呀，我今朝先食咗一個，個孫又食咗半個，美心好冇陰功呀， 昨日又食過大家樂呢！」
台灣地溝油製造商先至冇陰功，美心矇查查成為受害用家，我地就成為受害食家，真豈有此理，台灣啲名牌子亦受「誤導」用咗地溝油，對台灣整體形象打擊極度嚴重，問香港人仲敢唔敢每次去台灣都逛夜市，猛咁誇讚！左丁山以前都行過台北、高雄夜市嘅，印象好麻麻，總係嫌夜市食物唔夠乾淨企理。
香港月餅有冇受台灣地溝油污染呢？相信唔會啩，喺中秋節日照食可也，希望本港名牌品質有保證。因食蛋黃蓮蓉月餅比較易滯，近年只好淺嘗即止，試吓味道就算，家中月餅有奇華、國金軒、澳門鉅記、鴻星，食落幾唔錯吖，各擅勝場，至於最貴嘅半島奶黃、agnès b，就送晒俾肥仔K食，呢位80後，只喜歡奶黃，傳統蓮蓉月餅唔肯食。左丁山食得最多嘅就係五仁月，款款精彩。陸羽茶室每到中秋就有金華五仁月，細細塊當點心賣，四個賣84蚊，平過晒啲迷你奶黃月餅。陸羽五仁月好傳統，內有肥豬肉，食落有咬頭，香夾滑，但建築邦太太就嫌黐牙兼肥，要食黃双如嘅五仁月，呢款就冇咁肥，連杏仁都有兩三粒，幾貨真價實，最後食蔡瀾送來公司之蔡瀾月餅「紅豆欖仁」，話明係限量製作，只有1600盒，左丁山收到編號1120，寫明係東莞製作，初看就驚一驚，東莞曾是地溝油之都，好驚啫！食唔食好？最後都係相信「蔡瀾」兩隻字，蔡瀾噃，點會笨到用地溝油呀，於是召集家中十餘人一齊試食，根據說明，「此月餅採用之欖仁，乃全國最頂尖之山西欖仁，產量稀少，甘香鬆化，味道醇濃，口感豐富，既酥亦脆。」講得就巴閉，味道食落如何？嘩，真係有啲不同凡響，一如上述標籤說明，於是人人爭食，一盒只得4個，左丁山連忙收起一個俾自己先，其餘三個就大家分享啦。四姨問邊度有得賣，真係唔知，總之就係要多謝蔡瀾賜吃「紅豆欖仁月」啦！