商交所欠員工34萬元薪金，身為主席嘅前行會成員、梁粉張震遠畀勞工處票控。案件早於今年7月預審，原定下周一開審，但係八方得悉張震遠本月突然更換大狀同律師，由外籍大狀Christopher Grounds頂上。大狀噚日走去法庭申請延期，話新律師需要重新同警方、證監會同埋清盤人攞文件，未準備好聆訊。
裁判官錢禮批評張震遠浪費法庭時間，但考慮佢係公眾人物，而案件引起公眾關注，辯方亦只係首次提出同類申請，所以批准再押後到11月5日預審，案件預計明年1月先至開審。裁判官提醒辯方，張震遠雖然𠵱家冇出庭、只係由大狀代表，但開審時必須要現身。