繼李碧華《迷離夜》系列後，好耐都未嘗過咁有驚慄氣氛嘅港產片。陳果拍《紅VAN》前，同原作者Mr.Pizza講明一定改劇情同加自己嘢，借充滿詭異事件嘅大埔比喻現今香港。「大家無謂再呃自己，出面已經係唔同嘅世界。」、「2017年有普選吖嘛，同之前內定特首係唔同！」等對白，仲有公審投票、傾盆血雨染紅大地等，毋須高登仔解讀，政治隱喻已經畫晒出腸。龍叔叔不理政治，只愛煲碟，心知凌晨收工要趕住返屋企，煲埋呢套《紅VAN》再趕埋稿先有得瞓。
幾佩服陳果，將邊諗邊寫嘅網絡小說，拍出有架構嘅驚慄懸疑電影，將人性扭曲及矛盾衝突逐步放大，讓觀眾喺心入面寒出嚟。任達華鍾意扮大佬、林雪粗口未停過、李燦森演道友人鬼難分等，為影片增添不少笑料同戲味，極具娛樂性。可惜尾段因重度改編而開始失控，仲要等下集先有結局，未睇過原著嘅觀眾，必定以「一個字」加感嘆號嚟回敬。
BD聲畫表現在港產片上屬一級水準，同是1080p，畫面銳利度卻比同期港產片高一籌，而且導演愛在黑夜中以紅紅綠綠的微細燈光襯托，營造一股末世恐慌效果，色彩層次相當豐富。最like係音效，BD不單以杜比TrueHD Advanced音效輸出，且是取樣頻率更高的96k Upsampling，喺人聲及尖叫聲上表現得很細緻，尤其中段播放David Bowie《Space Oddity》一幕，幾乎逼近歐美演唱會嘅靚聲效果，龍叔叔聽出耳油，忍唔住loop多一次。
BD為雙碟版，最期待附加嘅Bonus Disc，希望在一堆謎團中尋找蛛絲馬迹，仲想知陳果點拍下集咁浩大嘅場面。可能為咗保留神秘感，陳果同班演員噏咗成粒鐘都唔到point，完全無新資訊，嘥時間囉。最弊附加碟以DVD收錄，480p畫質在47吋電視上播，起格情況嚴重到以為睇緊日本AV，Shine唱的主題曲《街口有落》MV，畫質慘不忍睹，谷鬼氣上番YouTube睇高清MV好過。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
