萬眾期待嘅蘋果發佈會曲終人散，新iPhone千呼萬喚終出來，一如預期提供4.7及5.5吋兩款，冇乜驚喜。反而新產品Apple Watch口碑唔錯，筆者唔少朋友猛讚隻錶好有型，側邊粒「的」尤其盞鬼，扭吓佢個畫面就識變大變細，過足手癮，已儲定錢出年買咁話。蘋果或許從速度和耐用之間做取捨，今次新iPhone配置A8晶片，能源效益比上一代高50%，但運算速度僅增25%，較對上幾代每次倍增失色。但蘋果產品本身嘅速度和流暢感一向突出，加上大芒機效應，熱賣可期，家陣仲開埋電子錢包同穿戴式產品兩條新財路，長線仍揸得過。
時來風送騰王閣。近排市場「厚多士」，歐洲央行上周爆半冷減息，話口未完英倫三島突然瀕臨分裂，觸動市場神經，未有耐三藩市聯儲銀行爆響口，指外界或低估美國加息步伐，所有劇情都等同幫美元吶喊助威，令其升勢火上加油。
美滙指數本周高見84.5，多隻非美貨幣穿晒位，歐元連1.29亦穿過，英鎊曾跌落1.6美元邊。係歐央行減息帶挈下，美元兌日圓上周五終衝破今年1月高位，昨日更衝破107，每百日圓兌港紙跌到7.24。日圓本月已累跌2.7%，在16隻主要貨幣中最不濟。日圓趴晒街，除了老生常談嘅息差因素，主要是形勢使然。雖然英鎊近日亦跌得急，但英倫銀行行長卡尼早兩日出口術話明春可能加息，加上最新民調及外圍博彩網都顯示，蘇格蘭脫英公投未必過關，令淡友唔敢肆意沽鎊。
形勢使然 沽yen最穩妥
此外，歐洲央行放水雖然對歐元帶來莫大壓力，但與其貨幣掛鈎嘅瑞士央行，早兩日重申不排除出動負利率應對，確保瑞郎兌歐元處於目標範圍，消息亦減輕歐元沽壓。
相反，日本央行行長黑田東彥昨日會見首相安倍晉三時，再次承諾有需要就會再出招，以確保通脹達標，市場解讀為日圓貶值開綠燈，加上美債孳息上升呢個誘因，家陣沽yen至係王道。
如無意外，美滙指數本周可創造九連捷佳績，下個禮拜焦點當然係儲局議息同蘇格蘭公投。因應儲局10月停止買債，近日有傳儲局考慮修改會後聲明的利率前瞻指引，市場好關注今次會後聲明，會否刪除停止買債後，應繼續維持低息一段時間「considerable time」這兩個英文字，如果出現呢個情況，市場對加息的預期勢必升溫，美元有力再下一城，年底前兌yen可挑戰110。相反，若耶倫繼續玩拖延策略，美元可能出現技術回吐。當然，如蘇格蘭下周四決定脫離英國，英鎊當然有難，美元會是贏家。
奇兵
本欄逢周五刊登