近排日圓跌至六年新低，加上踏入觀賞紅葉嘅旺季，唔少人換定日圓準備遊日，當中包括永隆銀行助理總經理及零售銀行部主管鍾少權。佢話都諗住趁日圓滙價跌，換定錢，打算本月底去沖繩自駕遊，叉足電再追target!
佢指，大環境轉變令銀行有唔少新安排，搞到之前好多嘢做，唔敢請假，家陣搞得七七八八先至行得開。佢仲專登為旅行準備咗個黃色特別版積木造型旅行篋，實行以潮人look起行。咁點解去日本呢？佢就話見日圓跌，去消費抵好多，可惜旺季將至，酒店房價就冇乜優惠。
鍾少權旅行返港就要搏殺，首要任務唔係追數，而係跟進分行同事換制服事宜。話說，佢收到後勤同事投訴，問點解只得前線員工有得換制服，鍾少權跟進緊，獲行長批准，處理埋細節就可分段實施。