中共建政65周年就到，香港唔少團體都有大搞作表心意。香港道教聯合會舉行一籃子活動，又論壇又展覽又大戲，多方面賀國慶，重頭戲係下月5號喺中環遮打道嚟個千人祈福會，唔通想搶先「佔中」？道聯會主席梁德華話，呢個祈福會佢哋構思咗好耐，耐過和平佔中喎，又話道聯會好有決心起道教文化中心，「天地人三界一心」，希望政府批地，初步心水係打鼓嶺坪輋路、雲泉仙館隔籬一幅10萬呎土地，預算造價7至10億。
嗇色園下月4號就喺紅館舉辦萬人抄《道德經》大會，噚日亦安排小朋友示範即場抄寫。有報道話嗇色園學校家長投訴子女被迫去抄經，嗇色園主席黃錦財話冇咁嘅事，「屬校參加係理所當然」，但又話會尊重學校自己決定點處理喎！