呢個欄名只係希望可以做到佔領頭排、縱橫股海咁解，重申純粹講股，不談政治！殼股飛天，豪特（6880）更已晉身準殼股，準買賣雙方已簽咗備忘錄，賣方且已擺低五球誠意金，剩低落嚟嘅問題就只係究竟豪特賣幾多，又或者佢潛在身價有幾多？
查豪特2011年底以每股1.58銀上市，即係家陣仲係潛緊水，其次豪特喺6月正式披露賣盤磋商，股價由復牌當日做1.1銀升到家陣近1.5銀，入場成本平均要1.3銀以上，最有啟示係張花紙，包括星展、輝立、花旗、大華繼顯及CIMB等幾家證券行，都係期間嘅主力加倉者，夾埋揸咗近5,000萬股，佔咗街貨近半，其中有近半數係喺宣佈賣盤磋商後加碼嘅，且仲係喺最近加得最狼，鳳凰味道甚濃！
今年3月結，豪特持2.31億銀現金，扣除1,480萬銀行貸款，即係持淨現金2.15億銀，折合每股0.67銀，即係家陣豪特做緊嘅市值只係2.7億銀左右，以佢正回升緊嘅中港保健產品主業衡量，絕對係被低估！還有呢隻股票嘅業務同財務一樣咁簡潔，股權夠集中，大股東揸咗五成幾，可視為最優質殼股級別，而未來買家嘅身份揭盅後，可能再行加分，故無論點計都好抵博，一拉閘簽約就應可中獎！
古道祥
本欄逢周五刊出