行政署喺政總加圍欄，有市民申請司法覆核挑戰呢個決定，獲白鴿黨何俊仁協助跟進。噚日佢哋見傳媒講解情況嘅時候，民主派已故戰將吳明欽愛女吳思諾Senia（圖）都在場。原來Senia5月開始做執業大律師，呢單會係佢首次由頭跟進嘅個案，坦言心情有啲緊張，但好開心可以做到自己想做嘅事，因為佢希望幫到弱勢社群：「政府成日都喺度蝦我哋啲示威者，希望可以通過法律手段，為大家爭取番啲最基本嘅權益」。佢話未來若有需要，或者要驚動師傅李柱銘出馬，未來都希望多啲接有關人權自由嘅個案，但暫時冇諗過入政黨。
鐵頭仁就大讚呢位世姪女好叻女，叫記者若有法律問題，不妨請教「吳大狀」，但暫時冇邀請呢位法律新星加入白鴿黨，正如談情，一切要順其自然。