學聯9.22起罷課一星期抗議人大落閘，唔少學生響應，教育界人士都金睛火眼贒實，諷刺嘅卻係教育局局長吳克儉，原來喺學界罷課之時同步「罷工」，獲批放大假。據聞呢個消息辣㷫唔少教育界中人，認為喺關鍵時刻，身為局長嘅吳得掂係咪應該銷假當值，以示承擔呢？
狼英亦曾為反國教留守
查實作為政治人物，好需要政治敏感度，過往不時有政客因為要處理公務而取消休假，留守崗位處理危機。就連由689人選出嘅特首狼振英，2012年上任冇耐都因為要化解反國教風波，臨時取消去俄羅斯出席APEC，否則肯定俾人鬧多幾錢重。
之不過政治智慧呢家嘢，有時可能係講慧根，八方聽聞喺學界鬧哄哄要罷課時，吳得掂日前雖然話反對罷課、又力促學校嚴懲曠課學生，但原來口水戰之後，佢自己會喺罷課期間「曠課」，下周二（16日）起放假逾一星期，換言之罷課期間若果爆大鑊，呢位局長都唔會坐鎮主持大局，又難怪有教育界中人諷刺佢其身不正搞「罷工」，有乜嘢資格鬧學生「罷課」？
八方問過教育局，發言人證實吳得掂9月16至24日休假，強調佢幾個月前已經申請9月中休假並獲批准，當時學聯仲未提出罷課，而佢休假期間由副局長楊潤雄署任局長。發言人補充，吳得掂放假期間會同教育局官員保持聯繫，「如有急切需要，會考慮提前銷假」！至於具體休假安排，發言人冇透露。學界係時候響應張融號召，打去舉報罷課熱線檢舉吳得掂「罷工」。
李八方
mailto:[email protected]