練馬師沈集成向來有鐵人之稱，呢朝佢自己勤力操馬外，就連空檔時間都冇浪費，喺機坪企咗好耐，原來等緊啲戰馬操完返嚟，向三位鬼佬騎師查問馬匹進度，首先係向韋達問「秋月春風」嘅情況，兩人從唔同方向走埋一齊，夠晒默契；然後視察李富嘅「彪形勁漢」，傾咗一陣；跟住就與杜利萊一齊睇「錢照收」，沈集成呢個接連捉「鬼」問進度嘅鏡頭，都可算少見，反映對開鑼日之戰抱有相當期望。
睇番「秋月春風」，的確係機會馬，四次跑1000米直路賽，三次得亞軍，唞暑後試過兩課大閘，都喺前面返嚟，大馬已經相當輕身谷起狀態，韋達新接手，梗係搏甩髀啦。
至於「彪形勁漢」同埋「錢照收」，咁啱都係上季只跑過一場即接近嘅質新馬，亦咁啱都跑第五，公認有潛質。尤其「彪形勁漢」，本身有後勁，今次增程跑1400米會更啱衝，初戴眼罩亦會更集中，加上排一檔靚位，絕對唔可以睇低。