木薯（841）踏入新財政年，泰國政局穩定番，加埋祖國環保國策下，對木薯產品需求勁大，嚟緊半年度成績單，有得博盈喜，又長線睇，何止掂過碌蔗？喺現水平，先博木薯翻半番。
泰國今年頭五個月，木薯喺咁多農產品出口當中，一枝獨秀，木薯條同木薯粉出口值增幅，去到35%同20%。木薯係泰國最大採購同出口木薯片商，兼且係祖國最大進口商，踏入新財政年，主打產品出口，已經有好靚仔勢頭。
食正糧食安全國策
又據泰國智庫「開泰研究中心」預測，喺祖國超強需求下，今年木薯條同木薯粉出口值，會去到403億泰銖（97億港元）同532億泰銖（128億港元），增加33%同16.5%。事實亦係咁，祖國喺環保國策下，對乙醇呢類環保能源需求大，阿爺目標喺由2010年時200萬噸，大幅提升四倍，到2020年1,000萬噸而以每生產1噸燃料乙醇計，就要用到2.9噸木薯。
再講，阿爺同樣好重視糧食安全國策，唔想用玉米呢類主流糧食，而係以好似木薯等食品，嚟提煉乙醇呢類環保燃料。
喺咁嘅情況底下，亦大大提高咗對木薯需求。木薯嚟緊日子，真係肥過肥仔水。
又木薯今年3月公佈，協議收購大股東朱銘泉祖國酒店項目，協議收購代價2.24億元，但唔係現兜兜畀錢，而係木薯發行1.35億股畀朱生。
朱生寧願要股唔要錢，對木薯前景，係爆晒燈；而股價快高長大，先係大茶飯。
只係keep木薯時本年度純利增長30%咁大把，到1.5億銀，預測PE跌到得4.6倍，木薯現價（1.53元）翻半番到2.3元計，PE未夠7倍。
錢雋
細價股專家
本欄逢周二、三、五刊出