隔牆有耳:梁高美懿做馬會大董 - 李八方

隔牆有耳:
梁高美懿做馬會大董 - 李八方

提起選舉呢兩個字,肯定觸動唔少人嘅神經,身為全港最大單一納稅機構香港賽馬會,噚晚示範咗乜嘢係真正嘅小圈子選舉!話說主席施文信任期屆滿,董事局除咗循例要選新一任主席,亦要喺遴選會員中選一位新董事加入董事局,取代施文信原有嘅位,令董事局要有齊腳12人!
雖則話主席個位由12位大董互選,但個遊戲規則,向來都係排資論輩頂上,即係由現任副主席葉錫安接棒上位;至於董事個位,當然係由小圈子產生!雖然幾百位遴選會員中,邊個對自己有信心,都可以報名參選,然後由其他遴選會員投票;若然只得一位參選人出閘,情況就會好似澳門選特首,崔世安可以順利「高票」當選!
奇就奇在,幾乎次次選董事,都只係得一個候選人入閘,今屆就係梁高美懿,八方聽聞原先有位姓李嘅對手,但唔知點解忽然消失咗!箇中理由一字咁淺,就係先要獲高人祝福,然後高調宣佈入紙參選,事關成班遴選會員個個有頭有面,冇高人祝福點會自己走出嚟攞架丟?梁高美懿得米後,連同范徐麗泰,馬會百幾年嚟首度同時有兩位女大董!馬會噚日亦宣佈過去一年嘅捐款刷新紀錄達36億1千萬,遠超上年度嘅19億5千萬。