大家樂（341）主席陳裕光自2012年退下火線，轉任非執行主席，唔知係咪養尊處優得耐，還是好似「玉女掌門人」周慧敏一樣食咗防腐劑，佢退休之後好似仲後生過以前，睇佢噚日出席股東會嘅舉手投足，點都唔似六十有二。
華華噚日搵到陳裕光1995年，即係19年前，佢做緊行政總裁嘅相片對照，單睇外表，基本上分別唔大，最大分別係以前個look、嗰款眼鏡加嗰款髮型真係好老土，𠵱家反而型佬好多。都說男人年紀越大，越有男人味；女人就比較難keep。
講番股東會，傳媒一列攝影機嚴陣以待，等管理層會後回應近日嘅地溝油事件。如果係以前，陳裕光肯定俾記者追到氣咳，但噚日佢開完股東會，就笑笑口風騷走人，呢個應該係其中一個青春秘訣。