【銅鑼灣】今年17歲嘅竇靖童唔單止遺傳咗媽咪王菲嘅歌藝，爽朗率直、不拘小節嘅性格都同王菲好似，前日佢同一位男性友人逛銅鑼灣，見友人想食煙，童童就好自然咁喺褲袋攞個打火機出嚟同對方點煙，經過烤肉乾店，就即買即食，當街大啖大啖將豬肉乾放入口，夠晒豪邁。
前日下午約4點，童童同前幾日去咗《超級巨聲4》面試嘅男友人Ernest去銅鑼灣行街，童童陪對方睇完電話配件後，本來想去玩HMV入面嗰部play station，點知撞正壞機，兩個人搞咗一輪都玩唔到，惟有失望離開，然後二人再會合一個女仔朋友去飲咖啡同傾偈。
巧遇上山詩鈉
一向喜歡中性打扮嘅童童，前日繼續長袖tee、牛仔褲襯cap帽出動，當童童經過一間賣烤肉乾的店舖，突然好興奮，不停向友人介紹店舖之餘，仲買完即刻企喺路邊食，然後一臉享受咁同友人講：「Oh my favourite！」不過佢朋友就似乎對童童手上嘅豬肉乾冇乜興趣。
童童逛街期間撞到好友Hilary媽咪上山詩鈉，二人即時嚟個擁抱，上山詩鈉就捉住童童講咗十幾分鐘，而童童前日與友人道別後就坐的士返咗陳家瑛位於淺水灣道嘅屋企。
採訪、攝影：徐錦池、畢紹基、潘冠恩
