呢排最hit話題係乜？未必係佔中同台灣地溝油，反而係iPhone 6即將開售，個個都諗住炒番轉，有人更預計iPhone 6 Plus最高可放到2萬蚊，淨賺至少1萬。
不過想喺蘋果官網買到新iPhone再放售，難度同中六合彩四獎差唔多，退而求其次，想少少哋賺番一百幾十飲餐下午茶，有隻老馬其實都幾穩陣；講緊嘅係開鑼日嘅「雙龍出海」，歷來跑過23次四班1400米，其中11次勝出或入三甲，買位置有錢收嘅比率近乎50%，而且蓄銳出擊零舍醒，大前季及前季都係一出即勝，上季就喺第二仗贏馬，擺明季初特佳。
今次「雙龍出海」唔係跑四班1400米，而係初跑水準更弱嘅五班1400米，把握當然更大，出到硬功騎師柏寶，仲要抽埋一檔，真係黃金機會。告達理訓練老馬向來有一手，之前「時尚風采」九歲都可以喺杜拜一級賽得亞軍；「雙龍出海」嘅路程性能，真係同iPhone一樣，都係咁可靠。