韋碧克由曼聯轉投阿仙奴，好多槍迷都覺得大鑊，話曼聯繼施維斯達之後又整件極品畀雲格嘆，至於曼聯球迷唔少都覺得開心，因為終於送走咗個瘟神。不過，小弟真心覺得韋碧克冇大家想像中咁廢。
3年前，韋碧克20歲，開始喺曼聯上位，呢個時候，佢最需要嘅係確定位置，同埋有穩定嘅上陣機會，等佢可以慢慢成長，但曼聯畀唔到呢兩樣嘢佢。喺11/12球季，韋碧克由新特蘭外借回歸嘅第一季，佢為曼聯23次英超正選，有20次踢正前鋒，呢季射入9個入波。到12/13球季，尹佩斯嚟咗，韋碧克得13次聯賽正選，5次踢右邊，5次踢左邊，兩次踢進攻中場，得一次踢最前，呢季佢得1個入波。上季，韋碧克15次英超正選入面，有9次踢前鋒，佢入咗9球。仲記唔記得舊年12月，尹佩斯同埋朗尼都受傷，就係靠韋碧克撐起條前鋒線，咁啱呢段日子係上季曼聯成績最好嘅時間。
韋碧克只係23歲，而且本身嘅盤扭同控球能力都唔錯，如果未來幾年喺射術方面好似史杜列治轉投利物浦後突然大躍進，呢1,600萬鎊絕對抵博。如果再諗埋英格蘭球員向來有溢價，其實韋碧克真係唔貴。
文：咖喱