高登巴打創意無限，可以將一啲名句夾入名人個名度，好似一死以謝天華、舉頭三尺有姚明、識時務者魏駿傑，身為阿仙奴球迷，差不多每年都睇到球員轉投曼城，今年做咗魏駿傑嘅就有沙格拿。坦白講，曼城出到14萬鎊周薪3年約，31歲嘅沙格拿又點會唔動心，與其年年續約都要同雲格拗一大餐，仲隨時被壓價，趁住仲有少少價值，點都要喺球員生涯尾聲搵多重保障，所以我一啲都冇怪佢。
或有人認為沙格拿轉會轉得儍，因為阿仙奴假假哋上季贏英足盃，好似冒起當中，以沙格拿喺球隊嘅資歷，華美倫走咗，佢都算係老大哥，就算唔係隊長，都可能做副隊長。不過如果講阿仙奴當起，曼城就一直喺高峯，近3年兩奪英超，之前由阿仙奴轉投曼城嘅拿斯尼、基捷基治都拎到英超冠軍獎牌，而且球會投入資金有增冇減，沙格拿隊友嘅實力亦只會更強，特別右閘，本身已經有薩巴列達可以輪換，沙格拿更加唔怕打殘。
阿仙奴與曼城因為太多「飼養」關係，由阿仙奴轉投曼城嘅球員又往往向兵工廠開火，好似艾迪巴約、拿斯尼咁，不過沙格拿個案有啲唔同，周六佢重返阿聯酋球場，我希望主隊球迷給予尊敬嘅掌聲，唔好好似拿斯尼咁全場勁噓就好嘞！
文：牽牛