上市公司或家族慈善基金捐錢畀藝術機構、慈善團體閒過立秋，贊助電影出品應該比較少有，下月中有一齣名為《爭氣》（圖）嘅兩小時紀錄片上映，就係由利希慎基金贊助。希慎（014）非執董利乾亦會於本周五出席電影活動。
利希慎基金由希慎大股東家族私人持有，於1973年創立，不過十分低調，主要捐助文化、教育、環境同埋醫療事業。
《爭氣》呢齣紀錄片緣自一套本地製作嘅音樂劇《震動心弦》，劇中演員來自特殊學校或band 3學校嘅中學生，獲得第79屆奧斯卡最佳紀錄短片獎嘅本港導演楊紫燁將佢哋嘅綵排情況拍成紀錄片。據講，楊導演主動搵利希慎基金總裁何宗慈傾合作，取得資金先至拍成。