話咁快就過咗中秋節，同大家補番句中秋節快樂！
今年以為打風乜都見唔到，好彩嗰晚抬頭一望都見到月光，我就去咗新城演唱會，同千嬅、側田過節！
講番中秋嗰日，好多老友記同我講今日好似冇開市，我話當然有啦！
內地股市放假，但香港股市都有開，可能係呢個原因，嗰日成交量好鬼靜，全日只有500幾億元，交投比平日少咗近300億元。
中國飛機租賃未升完
今次Prof J用蜻蜓投資法，捉到三隻ABC好股，想同大家分享一下，有兩隻之前已經同大家講過，唔知大家仲記唔記得呢？
上星期就曾經提過中盛資源（2623），我話係時候發力，開turbo，果然真係越開越有，短短一個星期間，已經升到3.1元以上，有買呢隻股票嘅朋友應該都賺咗唔少。
第二隻，就係半新股恒發洋參（911），有一日跌咗四個百分點，跌破2元，有個朋友同我講恒發洋參係時候要急速回落，我就話會繼續升，呢個只係大戶技倆，當然最後我講啱，恒發洋參越升越有，升破歷史高位，最高去到2.14元，真係估你唔到。
最後一隻就係半新股中國飛機租賃（1848），Prof J喺未上市前都提過，佢係全球第一間租飛機公司，處於領導地位，會係未來幾年發展或者拓展海外嘅業務，打算由而家34架機，去到2016年64架，增幅有成一倍，有冇咁犀利！
加上Prof J覺得內地會逐漸優化航空網絡，個「N稿」真係唔錯，睇埋股價表現，飛機租賃一邊飛高，一邊飛低，原來飛飛吓，已經去到6.3元以上，比招股價5.53元，升咗成15個百分比。
飛機租賃呢一排更加出現三支陽燭，升破多個歷史高位，好大機會仲會繼續爆升，未買飛機租賃嘅朋友，可以繼續追蹤，出發！
徐燦傑
齊魯國際控股首席策略總監
本欄逢周四刊出